Հունգարի | EUNewsletter

Հունգարիան և «ռուբիկ-կուբիկ»-ը

Էրնյո Ռուբիկ
Էրնյո Ռուբիկ
Հունգարիայում է ծնվել աշխարհում հայտնի և երբևէ ամենաշատ վաճառված խաղալիքը` «ռուբիկ-կուբիկը»: 1974 թվականին հունգարացի ճարտարապետ և դասախոս Էրնյո Ռուբիկը հնարել է մեխանիկական գլուխկոտրուկ` «կախարդական խորանարդ», որը, սակայն, աշխարհին հայտնի է դարձել հեղինակի անունով` «Ռուբիկի խորանարդ», իսկ խոսակցական լեզվում պարզապես` «ռուբիկ-կուբիկ»:

Մինչ օրս աշխարհում վաճառվել է ավելի քան 300 միլիոն «ռուբիկ-կուբիկ»: Այս ծավալը պատկերացնելու համար, ասենք, որ եթե բոլոր այդ խորանարդներն իրար վրա դրվեն, երկարությունը կձգվի Հարավային բևեռից մինչև Հյուսիսային բևեռ:

«Ռուբիկ-կուբիկ»-ի առաջին համաշխարհային առաջնությունն անցկացվել է Հունգարիայում 1982 թ.: 21-րդ դարում «ռուբիկ-կուբիկի» մրցումներ են անցկացվում նաև այլ անվանակարգերում` հավաքել մեկ ձեռքով, հավաքել ոտքերով, հավաքել փակ աչքերով և նույնիսկ հավաքել ջրի տակ` մեկ շնչով: Հավաքելու արագությամբ մինչ օրս չգերազանցված համաշխարհային ռեկորդ է սահմանել 14-ամյա ավստրալիացի Ֆելիքս Զեմդեքսը` 6.77 վայրկյանում: